За значны ўклад у развіццё сферы бытавога абслугоўвання насельніцтва, прафесіяналізм, дасягненне высокіх вытворчых паказчыкаў дырэктар адкрытага акцыянернага таварыства «Ельскі камбінат бытавога абслугоўвання» Вольга Каляда ўзнагароджана Ганаровай граматай Савета Міністраў Рэспублікі Беларусь.
«Вынікі Вашай працы, Вольга Міхайлаўна, ацэнены на вельмі высокім узроўні. Спадзяюся, што гэта ўзнагарода не апошняя і вы яшчэ неаднаразова будзеце атрымліваць граматы і дыпломы», – адзначыў міністр гандлю Валянцін Чэканаў, уручаючы Ганаровую грамату нашай зямлячцы Вользе Калядзе падчас рэспубліканскага фестывалю-ярмаркі «Дажынкі 2013».
Гэтай пачэснай узнагародай ацэнена шматгадовая праца Вальгі Каляды. Больш як 42 гады шчыруе яна ў галіне бытавога абслугоўвання насельніцтва. У яе працоўнай кніжцы толькі адзін запіс, праца на адным прадпрыемстве, з якім яна зраднілася і без якога не ўяўляе свайго жыцця. Пачынаючы працаваць вязальшчыцай трыкатажнага цэха, Вольга Міхайлаўна прайшла ўсе прыступкі службовай лесвіцы. У свой час ёй прыйшлося працаваць кантралёрам, кладаўшчыком, загадчыцай атэлье, загадчыцай Дома быту, галоўным інжынерам, а зараз – дырэктарам ААТ «Ельскі камбінат бытавога абслугоўвання».
«Мая праца – гэта маё жыццё. У КБА я знайшла сябе і рэалізавала свае здольнасці. Мне падабаецца працаваць з людзьмі, дапамагаць ім, ствараць для іх разнастайныя і такія неабходныя рэчы. А што датычыць узнагароды, дык зазначу: мне вельмі прыемна, што маю самаадданую працу заўважылі і так высока ацанілі. Гэта ўзнагарода падштурхоў-вае да новых дасягненняў і поспехаў у працы», – па-дзялілася сваімі думкамі Вольга Каляда.
Таццяна Петрухно
Замечательный руководитель, ответственный человек! Всегда гордился Вами Ольга Михайловна