Восьмы год запар на базе Дабрынскай сярэдняй школы праводзіцца ваенна-спартыўная гульня «Зарніца». У гэтым годзе яна прайшла 26 мая і была прысвечана 70-й гадавіне Перамогі савецкага народа ў Вялікай Айчыннай вайне і Дню пагранічніка.
У гэтым годзе кожную з васьмі каманд з Ельскага і Нараўлянскага раёнаў папоўнілі госці з далёкай Галандыі, якія ў гэтыя дні гасцююць у Дабрыні.
На ўрачыстым пастраенні з прывітальным словам да гасцей і ўдзельнікаў спаборніцтваў звярнуўся дырэктар Дабрынскай сярэдняй школы Аляксандр Пазняк. Ваенны камісар Ельскага раёна Юрый Яначкін пажадаў, каб моладзь сваімі ўчынкамі і дасягненнямі змагла паказаць, што яна дастойная змена сваіх дзедаў, абаронцаў Айчыны.
Юрый Яначкін таксама павіншаваў пагранічнікаў заставы «Роза Люксембург», якія прысутнічалі на спаборніцтвах, з прафесійным святам.
Атрымаўшы паштоўкі з заданнямі, каманды прыступілі да гульні. Для перамогі атрадам неабходна было хутка прайсці дзевяць выпрабаванняў («Рота, пад’ём», «Арсенал ведаў», «Салдацкі абед», «Трапны стралок», «Артылерысты», «Шпіталь», «Міннае поле», «Разведчыкі»), у якіх праявіць згуртаванасць і кемлівасць, паказаць высокую дысцыплінаванасць. За ходам ваенна-спартыўнай гульні пільна сачыла судзейская калегія, якая складалася з педагогаў, прадстаўнікоў органаў пагранічнай службы і медработніка.
Пасля праходжання камандамі ўсіх этапаў у «штабе» былі падведзены вынікі. Пераможцам ваенна-спартыўнай гульні «Зарніца» стала каманда «Дабравольцы» (11 клас Дабрынскай СШ), 2-е месца заваявала каманда «Зорка» (7 клас Дабрынскай СШ), 3-е месца заняла каманда «Адзінства» (8 клас Дабрынскай СШ).
Васіль Сакула
Много команд в этом году играло. Наверное, было интересно и весело?