На рэспубліканскім фестывалі-кірмашы «Дажынкі 2012» у складзе дэлегацыі з Ельшчыны была адна з лепшых аператараў машыннага даення раёна – Таццяна Глумава з КСУП «Ельск».
Шматгадовы вопыт самаадданай працы дапамагае Таццяне Глумавай з году ў год дасягаць добрых поспехаў і быць пастаянным перадавіком у галіне жывёлагадоўлі.
– Ёй не трэба бясконца гаварыць і паказваць, што і як патрэбна рабіць, нагадваць нешта. Таццяна Іванаўна – шчырая працаўніца ў гаспадарцы. Калі б усе былі такія, як яна, ніякіх бы праблем не было, – расказаў Фёдар Якушэнка, брыгадзір малочнатаварнай фермы Камуна, дзе працуе перадавая даярка.
– Таццяна любіць жывёл, умее з імі абыходзіцца, таму яны і дзякуюць ёй. Вясною гэтага года Таццяна Іванаўна набрала групу нецялей, раздаіла яе. І вось атрымаліся наступныя паказчыкі ў гэтай даяркі: з чэрвеня яна надаіла 2830 кілаграмаў малака ад каровы-першацёлкі, а наогул з пачатку года ў яе – 5058 кілаграмаў малака на кожную карову. Напрыклад, у кастрычніку надой склаў 561 кілаграм ад каровы, а валавы надой у гэтым месяцы – 20756 кілаграмаў. Паказчыкі, хачу заўважыць, даволі добрыя, таму што іншыя даяркі ў гэтым жа месяцы атрымалі намнога менш малака ад каровы.
Таццяна Глумава – чалавек сціплы, пра свае дасягненні не вельмі ахвотна расказвае. Прызнаецца, што было вельмі прыемна і неспадзявана атрымаць запрашэнне пабываць на «Дажынках 2012»: яе працу заўважылі і высока ацанілі. Асабліва ўразіла жанчыну ў Горках арганізацыя мерапрыемства: усё вакол было прадумана да дробязяў, шчырыя адносіны да ўдзельнікаў фестывалю-кірмашу, культурная праграма.
– Уражанняў засталося вельмі многа, – адзначае Таццяна Глумава, – і калі бачыш, што вынікі тваёй працы заслугоўваюць высокай адзнакі, хочацца працаваць яшчэ з большай аддачай.
Ганна Булаўка
