На мінулым тыдні на базе Ельскай раённай дзіцячай бібліятэкі для наведвальнікаў летняй пляцоўкі, што працуе пры раённай гімназіі, прайшло цікавае, пазнавальнае мерапрыемства пад назвай «Мая Радзіма Беларусь», прысвечанае галоўнаму дзяржаўнаму святу – Дню Незалежнасці.
У кожнага народа ёсць па-дзеі і даты, якія ён не можа і не павінен забываць. Для беларусаў адной з такіх дат з’яўляецца дзень вызвалення краіны ад нямецка-фашысцкіх захопнікаў.
На пачатку мерапрыемства работнікі дзіцячай бібліятэкі нагадалі хлопчыкам і дзяўчынкам, чаму менавіта 3 ліпеня наша дзяржава адзначае Дзень Незалежнасці, разам з дзецьмі зазірнулі ў гістарычнае мінулае нашай краіны.
Рабяты з вялікім задавальненнем расказвалі пра дзяржаўныя сімвалы, успаміналі прымаўкі і прыказкі пра радзіму, разгадвалі загадкі, адказвалі на розныя пытанні.
У ходзе мерапрыемства жадаючыя таксама змаглі паўдзельнічаць у цікавых конкурсах, калі, уявіўшы сябе салдатам, патрэбна было на хуткасць перабінтаваць «параненага» таварыша, пачысціць бульбу, прышыць гузікі або па-змагацца за званне самага трапнага стралка і многае іншае. Завяршылася сустрэча праглядам відэафільма пра Беларусь.
Жанна Дзянісава
