Дзяржаўная ўстанова адукацыі «Ельская раённая гімназія» цесна супрацоўнічае ў рамках міжведамаснага плана з раённым аддзелам па надзвычайных сітуацыях. Трэба сказаць, абедзве стараны прыкладаюць немалыя намаганні для плённага супрацоўніцтва. Так, нядаўна вучні пятага і шостага класаў Ельскай раённай гімназіі разам з настаўніцай Святланай Бычкоўскай пабывалі на экскурсіі ў Ельскім РАНС.
Экскурсія была арганізавана ў сувязі з правядзеннем у гімназіі тыдня прафесійнай арыентацыі. Асноўная мэта экскурсіі – знаёмства вучняў з прафесіяй выратавальнікаў, буднямі супрацоўнікаў РАНС. Пад час экскурсіі дзеці пазнаёміліся з узорамі пажарна-выратавальнай тэхнікі, ім дазволілі прымераць форму, некаторыя рэчы з абмундзіравання выратавальнікаў, жадаючыя нават маглі сесці за руль пажарнага аўтамабіля. Супрацоўнікі РАНС расказалі вучням аб тым, колькі няшчасных выпадкаў адбылося ў раёне за апошні час па віне чалавека, растлумачылі правілы пажарнай бяспекі і іншае.
Хлопчыкам і дзяўчынкам экскурсія вельмі спадабалася. Яны змаглі на месцы атрымаць адказ на любое пытанне. Напрыклад, вучням цікава было паслухаць, як ратуюць людзей у час стыхійных бедстваў і надзвычайных сітуацый. Акрамя таго, яны даведаліся, што для таго, каб стаць выратавальнікамі, неабходна добра вучыцца, быць моцнымі духам, здаровымі целам і займацца спортам.
Жанна Рынгоўская