На мінулым тыдні партфель першакласніцы, напоўнены ўсімі неабходнымі школьнымі прыладамі, уручыў Георгій Цык, старшыня Ельскага райкама прафсаюза работнікаў АПК.
Штогод арганізоўваецца акцыя «Збяром партфель першакласніку» Ельскай раённай прафсаюзнай арганізацыяй работнікаў аграпрамысловага комплексу. Сёлета шчаслівай уладальніцай партфеля ад прафсаюза стала першакласніца з горада Ельска Анастасія Міхевіч. Яе маці Людміла Міхевіч працуе загадчыцай склада ў КСУП «Ельск» і выхоўвае траіх дзяцей. Прафсаюзная дапамога напярэдадні новага навучальнага года аказалася добрай падтрымкай для сям’і.
Уручаючы партфель дзяўчынцы, якая 2 верасня атрымае ганаровае званне школьніцы, Георгій Цык пажадаў будучай вучаніцы поспехаў у вучобе, добрага настрою і толькі выдатных адзнак.
Ганна Гаўрылава
